01000100 01001001 01010100 ກົມເຕັກໂນໂລຊີ ການສື່ສານຂໍ້ມູນຂ່າວສານ

ກອງປະຊຸມ ສະຫຼຸບ ແລະ ມອບໃບກຽດຕິຄຸນ-ໃບຍ້ອງຍໍ ງານ Lao ICT Award 2017



  ກະຊວງ ໄປສະນີ ໂທລະຄົມມະນາຄົມ ແລະ ການສື່ສານ ໄດ້ຈັດກອງປະຊຸມ ສະຫຼຸບ ແລະ ມອບໃບກຽດຕິຄຸນ-ໃບຍ້ອງຍໍ ງານ Lao ICT Award 2017 ຂຶ້ນທີ່ຫ້ອງປະຊຸມສະຖາບັນເຕັກໂນໂລຊີການສື່ສານຂໍ້ມູນຂ່າວສານໃນວັນທີ 17 ຕຸລາ 2017 ໂດຍການເປັນປະທານ ຂອງທ່ານ ທະນົງເດືອນ ຕຸລິຫົງ ຮອງຫົວໜ້າກົມເຕັກໂນໂລຊີການສື່ສານຂໍ້ມູນຂ່າວສານ, ກະຊວງ ໄປສະນີ ໂທລະຄົມມະນາຄົມ ແລະ ການສື່ສານ, ພ້ອມມີຜູ້ເຂົ້າຮ່ວມ ຈາກບັນດາກົມ, ກະຊວງ, ອົງການທຽບເທົ່າ, ບໍລິສັດທາງດ້ານໄອຊີທີ, ຫົວໜ່ວຍທຸລະກິດ ແລະ ສະຖາບັນການສຶກສາຕ່າງໆ.
   ຈຸດປະສົງຂອງກອງປະຊຸມຄັ້ງນີ້ ແມ່ນເພື່ອສະຫຼຸບ, ມອບໃບກຽດຕິຄຸນໃຫ້ແກ່ບັນດາຜູ້ສະໜັບສະໜູນ ແລະ ມອບໃບຍ້ອງຍໍ້ໃຫ້ທີມຜູ້ທີ່ໄດ້ຮັບລາງວັນໃນການແຂ່ງຂັນ ງານ Lao ICT Award 2017, ໃນທີ່ປະຊຸມ ທ່ານ ອຳພອນສັກ ເທບພູມີ, ຫົວໜ້າພະແນກເສດຖະກິດດິຈິຕອນ ໄດ້ຂື້ນລາຍງານຜົນການຈັດຕັ້ງປະຕິບັດງານ ແລະ ປະເມີນຈຸດດີຈຸດອອ່ນຂອງການຈັດຕັ້ງປະຕິບັດ ພ້ອມທັງກ່າວແຜນການຈັດງານ Lao ICT Award ຄັ້ງທີ 2 ໃນປີ 2018 ທີ່ຄາດວ່າຈະຈັດຂື້ນໃນເດືອນ ພຶດສະພາ 2018, ຫຼັງຈາກນັ້ນ ທ່ານ ທະນົງເດືອນ ຕຸລິຫົງ ຮອງຫົວໜ້າກົມເຕັກໂນໂລຊີການສື່ສານຂໍ້ມູນຂ່າວສານ, ກະຊວງ ໄປສະນີ ໂທລະຄົມມະນາຄົມ ແລະ ການສື່ສານໄດ້ໃຫ້ກຽດຂື້ນກ່າວກ່ຽວກັບການຈັດການແຂ່ງຂັນ Lao ICT Award 2017 ໂດຍມີເນື້ອໃນບາງສ່ວນຄື: ການແຂ່ງຂັນຄັ້ງນີ້ ໄດ້ມີຫຼາກຫຼາຍຜະລິດຕະພັນທີ່ສະໜອງການບໍລິການໃຫ້ແກ່ຫຼາຍຂະແໜງການແຕກຕ່າງກັນ ເຊັ່ນ ບາງຜະລິດຕະພັນ ກໍ່ສາມາດສ້າງເປັນທຸລະກິດໄດ້, ບາງຜະລິດຕະພັນ ກໍ່ໃຫ້ບໍລິການແກ່ປະຊາຊົນ ຫຼື ຫົວໜ່ວຍທຸລະກິດ ໂດຍບໍ່ເສຍຄ່າ ແລະ ພິເສດ ບາງຜະລິດຕະພັນທີ່ສ້າງຂື້ນມາ ເພື່ອບໍລິການສັງຄົມ ໂດຍບໍ່ຫວັງຜົນຕອບແທນ. ສິ່ງເຫຼົ່ານີ້ ກໍ່ແມ່ນໝາກຜົນໜຶ່ງຂອງການຈັດງານນີ້ ຕາມແນວທາງຂອງພັກ-ລັດ ກໍ່ຄືແຜນພັດທະນາຂອງ ກະຊວງ ໄປສະນີ, ໂທລະຄົມມະນາຄົມ ແລະ ການສື່ສານ ໂດຍຊຸກຍູ້ໃຫ້ມີການສ້າງນະວັດຕະກຳໃໝ່ ທາງດ້ານໄອຊີທີ ເພື່ອໃຫ້ບໍລິການແກ່ທົ່ວສັງຄົມ.
   ນອກຈາກນັ້ນທ່ານໄດ້ກ່າວຕື່ມວ່າ: ໃນນາມກະຊວງ ໄປສະນີ, ໂທລະຄົມມະນາຄົມ ແລະ ການສື່ສານ, ຂ້າພະເຈົ້າ ມີຄວາມພາກພູມໃຈທີ່ໄດ້ຈັດ ການແຂ່ງຂັນໄອຊີທີລາວ ຂື້ນເປັນຄັ້ງທຳອິດ ໂດຍສາມາດຄັດເລືອກເອົາຜະລິດຕະພັນທີ່ ໂດດເດັ່ນເຂົ້າແຂ່ງຂັນລະດັບອາຊຽນ ແລະ ກໍ່ສາມາດເຂົ້າຮອບສຸດທ້າຍໄດ້ ເຖິງສອງຜະລິດຕະພັນໃນ 3 ຜະລິດຕະພັນ ທີ່ສົ່ງເຂົ້າຮ່ວມ. ຊຶ່ງມັນກໍ່ສະແດງໃຫ້ເຫັນອີກຜົນສຳເລັດໜຶ່ງຂອງການແຂ່ງຂັນພາຍໃນປະເທດ ທີ່ບໍ່ເປັນພຽງແຕ່ເວທີການຂັດເລືອກ ກ່ອນການກ້າວສູ່ລະດັບສາກົນ ແຕ່ມັນອາດເປັນຈຸດເລີ່ມຕົ້ນຂອງຜົນສຳເລັດ ຂອງນັກພັດທະນາຮຸ່ນໃໝ່ ທາງດ້ານໄອຊີທີ.
   ໃນຕອນທ້າຍຂອງກອງປະຊຸມກໍ່ມີການມອບໃບກຽດຕິຄຸນໃຫ້ແກ່ບັນດາຜູ້ສະໜັບສະໜູນ ແລະ ທີມຜູ້ທີ່ໄດ້ຮັບລາງວັນໃນການແຂ່ງຂັນເຊີ່ງມີລາຍລະອຽດດັ່ງລຸ່ມນີ້:

  ມອບໃບກຽດຕິຄຸນໃຫ້ແກ່ບັນດາຜູ້ສະໜັບສະໜູນຈຳນວນ 07 ບໍລິສັດຄື:

  ລັດວິສາຫະກິດ ລາວໂທລະຄົມ, ບໍລິສັດ Unitel, ບໍລິສັດ TVS (ALO), ບໍລິສັດ ETL, ບໍລິສັດ Cyberia, ບໍລິສັດ DataCom, ບໍລິສັດ MicroInfo, SkyTelecom

  ມອບໃບຍ້ອງຍໍໃຫ້ແກ່ຜູ້ໄດ້ຮັບວັນລາງຈາກການແຂ່ງຂັນ Lao ICT Award 2017 ຈຳນວນ 07 ລັງວັນຄື:

  1. ອັນດັບທີ 1: ທີມສະມາຄົມເພື່ອຄົນອໍທິດສະຕິກ (Lao Autism Talk);
  2. ອັນດັບທີ 2: ທີມໂຕະລາວ (TOHLAO Coworking Space and Service);
  3. ອັນດັບທີ 3: ທີມ BIZGITAL (BIZGITAL Company);
  4. ລາງວັນຊົມເຊີຍ: ກະຊວງອຸດສາຫະກໍາ ແລະ ການຄ້າ (Lao PDR Trade Portal);
  5. ລາງວັນຊົມເຊີຍ: ທີມ Devzy (Lao Navi);
  6. ລາງວັນຊົມເຊີຍ: ທີມ KiWi Group (VaiVai);
  7. ລາງວັນພິເສດ: ທີມ ທ່ານ ແສງແກ້ວ ວ່າງເຊຍວີ່ (Font Lao);