01000100 01001001 01010100 ກົມເຕັກໂນໂລຊີ ການສື່ສານຂໍ້ມູນຂ່າວສານ

ປະຊຸມສຳມະນາ ວຽກງານຄຸ້ມຄອງບໍລິການ OTT ໃນ ສປປ ລາວ



  ໃນຕອນເຊົ້າຂອງວັນທີ 22 ມີຖຸນາ 2017 ນີ້, ທີ່ສະຖາບັນ ICT, ກະຊວງ ໄປສະນີ, ໂທລະຄົມມະນາຄົມ ແລະ ການສື່ສານ (ປທສ) ໄດ້ຮ່ວມກັບ ສະຫະພາບໂທລະຄົມມະນາຄົມສາກົນ (International Telcommunication Union : ຫຼືເອີ້ນວ່າ ອົງການ ITU) ຈັດກອງປະຊຸມສຳມະນາ ວຽກງານຄຸ້ມຄອງບໍລິການ Over-The-Top ຫຼື OTT ກອງປະຊຸມຄັ້ງນີ້ ເປັນກຽດເປັນປະທານຂອງ ທ່ານ ພູຂົງ ຈິດຮູບໂລກ, ຫົວໜ້າກົມແຜນການ ແລະ ການຮ່ວມມື, ກະຊວງ ປທສ ແລະ ປະທ່ານຮ່ວມ ໂດຍທ່ານ Sharma Sameer ຊ່ຽວຊານອາວຸໂສ, ຈາກອົງການ ITU. ມີການເຂົ້າຮ່ວມຂອງ ຄະນະກົມ, ຄະນະພະແນກ, ຜູ້ບໍລິການ, ວິຊາການ ຈາກບັນດາກົມອ້ອມຂ້າງກະຊວງ ປທສ, ກະຊວງ ອຸດສະຫະກຳ ແລະ ການຄ້າ, ກະຊວງຖະແຫຼ່ງຂ່າວ, ວັດທະນາທຳ ແລະ ທ່ອງທ່ຽວ, ກະຊວງການເງິນ, ທະນາຄານກາງ, ບໍລິສັດ ໃຫ້ບໍລິການໂທລະຄົມ ແລະ ອິນເຕີເນັດ ຈຳນວນທັງໝົດ 29 ທ່ານ.



  ຈຸດປະສົງຂອງກອງປະຊຸມຄັ້ງນີ້ ແມ່ນສ້າງຄວາມຮັບຮູ້ ແລະ ເຂົ້າໃຈ ຜົນກະທົບ ທັງດ້ານບວກ ແລະ ດ້ານລົບ ຂອງການບໍລິການ OTT ພ້ອມກັບຍົກໃຫ້ເຫັນການຄຸ້ມຄອງຂອງບາງປະເທດ ໂດຍຜ່ານການນຳສະເໜີ ຂອງຊ່ຽວຊານຈາກ ອົງການ ITU ໃນສາມຫົວຂໍ້ ຄື: (1) ແນວໂນ້ມຂອງການພັດທະນາ ICT, ນະວັດຕະກຳ ແລະ ສະພາບການບໍລິການ OTT, (2) ການຄຸ້ມຄອງ ICT ໃນການກ້າວໄປສູ່ຍຸກໃໝ່ ແຫ່ງການບໍລິການອອນລາຍ ແລະ ເສດຖະກິດດີຈີຕອນ, (3)ການຄຸ້ມຄອງການບໍລິການ OTT ຂອງບັນດາປະເທດໃນອາຊຽນ.
ໃນກອງປະຊຸມດັ່ງກ່າວ ທ່ານ ພູຂົງ ຈິດຮູບໂລກ ໄດ້ກ່າວບາງຕອນວ່າ ໃນປະຈຸບັນ ບໍລິການ OTT ບໍ່ພຽງແຕ່ສະໜອງການສື່ສານຜ່ານອິນເຕີເນັດເທົ່ານັ້ນ ເຊັ່ນ Whatsapp, Line, Skype, Wechat ແຕ່ມັນໄດ້ປະຍຸກໃຫ້ມີການບໍລິການທີ່ຫຼາກຫຼາຍ ແລະ ໄດ້ສ້າງຜົນປະໂຫຍດມະຫາສານໃຫ້ແກ່ຜູ້ຊົມໃຊ້ ດ້ວຍການສະໜອງຂໍ້ມູນຂ່າວສານ ແລະ ສິ່ງທີ່ໜ້າສົນໃຈໃນໂລກອິນເຕີເນັດ ໂດຍຜ່ານຜະລິດຕະພັນ ຫຼື ການບໍລິການຕ່າງໆ ດ້ວຍການບໍລິການໃນລາຄາຕໍ່າ ຫຼື ບໍ່ມີຄ່າໃຊ້ຈ່າຍ ເຊັ່ນ e-commerce, social media, e-banking, e-health, online education, ການບັນເທີງ ແລະ ອື່ນໆ. ການບໍລິການ OTT ເຖິງຈະສ້າງຜົນປະໂຫຍດຫຼາຍຢ່າງໃຫ້ແກ່ຜູ້ຊົມໃຊ້ ແຕ່ໃນແງ່ຂອງຜູ້ຄຸ້ມຄອງ ແມ່ນມີຄວາມຫຍຸ້ງຍາກຫຼາຍ ເພາະການບໍລິການຮູບແບບດັ່ງກ່າວນັບມື້ນັບລາກຫຼາຍ ແລະ ຖືກພັດທະນາຢ່າງໄວວາ ຊຶ່ງມັນກໍ່ໄດ້ສົ່ງຜົນກະທົບໃຫ້ ການບໍລິການແບບດັ່ງເດີມ ຫຼື ການຄຸ້ມຄອງຂອງມະຫາພາກ ເຊັ່ນ ເຮັດໃຫ້ລາຍຮັບຂອງຜູ້ໃຫ້ບໍລິການໂທລະຄົມຫຼຸດລົງມະຫາສານ; ບໍ່ສາມາດຄຸ້ມຄອງເນື້ອໃນໄດ້ ຫຼື ມີການລະເມີດລິຂະສິດກັນຫຼາຍ. ບັນຫາເຫຼົ່ານີ້ ກາຍເປັນສິ່ງທ້າທາຍຂອງມະຫາພາກໃນການຄຸ້ມຄອງ ໂດຍສະເພາະ ວຽກງານ ການອອກອະນຸຍາດ, ການກຳນົດລາຄາໃຫ້ບໍລິການ ແລະ ການເກັບອາກອນລາຍຮັບ.
ຜ່ານການນຳສະເໜີຂອງຊ່ຽວຊານ ITU ຫຼາຍຝ່າຍກໍ່ໄດ້ຮັບຮູ້ ແລະ ເຂົ້າໃຈເຖິງຜົນກະທົບດັ່ງກ່າວ ທັງຈາກພາກລັດ ແລະ ເອກະຊົນ ພ້ອມກັນນັ້ນ ກໍ່ໄດ້ສົນທະນາແລກປ່ຽນບົດຮຽນ ຊຶ່ງຫຼາຍພາກສ່ວນກໍ່ຍົກໃຫ້ເຫັນ ຜົນກະທົບເຖິງຂະແໜງການຂອງຕົນ ເປັນຕົ້ນ ວຽກງານ ຖະແຫຼ່ງຂ່າວ ກໍ່ໃຫ້ຮູ້ວ່າ ລາຍຮັບຂອງບັນດາສະຖານີໂທລະພາບ, ວິທະຍາ ແລະ ໜັງສືພິມ ກໍ່ຫຼຸດລົງຫຼາຍ ຍ້ອນຜູ້ຄົນຫັນໄປຊົມໃຊ້ບໍລິການອ່ອນລາຍ ຊຶ່ງກໍ່ມີຜູ້ບໍລິການທາງອອນລາຍຫຼາຍລາຍ ຍັງບໍ່ໄດ້ຮັບອະນຸຍາດຈາກຂະແໜງການ. ບັນດາບໍລິສັດໃຫ້ບໍລິການ ໂທລະຄົມ ກໍ່ພົບບັນຫາເຊັ່ນດຽວກັນ ທີ່ລາຍຮັບຫຼັກຈາກການບໍລິການ ໂທລະສັບແບບດັ່ງເດີມຕົກລົງມະຫະສານ ແຕ່ສຽງຮຽກຮ້ອງຂອງປະຊາຊົນໃຫ້ຍົກສູງຄຸນນະພາບຂອງອິນເຕີເນັດພັດຫຼາຍຂື້ນ ຊຶ່ງເຮັດໃຫ້ບາງບໍລິສັດມີບັນຫາທີ່ບໍ່ມີສາມາດປັບປຸງຄຸນນະພາບບໍລິການອິນເຕີເນັດຂອງຕົນ ຍ້ອນຂາດງົບປະມານ. ນອກນັ້ນ ກອງປະຊຸມ ຍັງໄດ້ມີທັດສະນະ ສະເໜີໃຫ້ທຸກພາກສ່ວນມີສ່ວນຮ່ວມໃນການ ເລັ່ງຊຸກຍູ້ ແລະ ສົ່ງເສີມ ການສ້າງເນື້ອໃນອອນລາຍທີ່ເປັນພາສາລາວ ແລະ ເກັບໄວ້ໃນ ສປປລາວ ຫຼາຍຂື້ນ ເພື່ອຫຼຸດຜ່ອນການຊື້ອິນເຕີເນັດຈາກສາກົນ ແລະ ຈະເຮັດໃຫ້ອິນເຕີເນັດພາຍໃນໄວຂື້ນ.
ຫຼັງຈາກກອງປະຊຸມສຳມະນີ ກະຊວງ ປທສ ກໍ່ຈະສືບຕໍ່ຮ່ວມກັບ ຊ່ຽວຊານ ITU ສຶກສາເກັບກຳຂໍ້ມູນເພີ່ມຕື່ມ ແລະ ສ້າງແນວທາງການຄຸ້ມຄອງການບໍລິການ OTT ໃຫ້ຢ່າງເໝາະສົມ ບົນພື້ນຖານ ລັດສາມາດຄຸ້ມຄອງ, ຜູ້ໃຫ້ບໍລິການມີຜົນກຳໄລ ແລະ ຜູ້ໃຊ້ບໍລິການໄດ້ຮັບຜົນປະໂຫຍດສູງສຸດ ເພື່ອພ້ອມກັນກ້າວສູ່ຍຸກເສດຖະກິດແບບໃໝ່ ທີ່ເອີ້ນວ່າ ຍຸກເສດຖະກິດດີຈີຕອນ.