01000100 01001001 01010100 ກົມເຕັກໂນໂລຊີ ການສື່ສານຂໍ້ມູນຂ່າວສານ

ກະຊວງ ໄປສະນີ, ໂທລະຄົມມະນາຄົມ ແລະ ການສື່ສານ ຈັດກິດຈະກໍາ ການເຜີຍແຜ່ຄວາມຮູ້ ດ້ານໄອຊີທີ ໃຫ້ນັກສຶກສາ



  ໃນຕອນບ່າຍ ຂອງວັນທີ 17 ພຶດສະພາ 2017 ນີ້, ທີ່ ສະຖາບັນ ICT, ກົມເຕັກໂນໂລຊີການສື່ສານ ຂໍ້ມູນຂ່າວສານ, ກະຊວງ ປທສ ໄດ້ຮ່ວມກັບ ລັດວິສາຫະກິດ ລາວໂທລະຄົມ ຈັດງານ ກິດຈະກຳເຜີຍແຜ່ຄວາມຮູ້ ດ້ານໄອຊີທີ ທີ່ ສະຖາບັນ ICT ໂດຍການເປັນປະທານຂອງ ທ່ານ ປອ. ທະວີສັກ ມະໂນທັມ, ຫົວໜ້າກົມ ເຕັກໂນໂລຊີການສື່ສານ ຂໍ້ມູນຂ່າວສານ, ກະຊວງ ປທສ, ທ່ານ ບັນຈົງ ເພັດສີແດງ ຜູ້ອຳນວຍການ ສະຖາບັນ ICT, ແລະ ທ່ານ ສຸພອນ ປັນຍາດາ, ຫົວໜ້າ ຝ່າຍສະໜັບສະໜູນ ນະຄອນຫຼວງ, ລັດວິສາຫະກິດ ລາວໂທລະຄົມ.



  ຈຸດປະສົງຂອງກິດຈະກຳໃນຄັ້ງນີ້ແມ່ນ ການສະເໜີຄວາມຮູ້ກ່ຽວກັບ ສື່ສັງຄົມອອນລາຍ ໂດຍມີເນື້ອໃນທັງດ້ານດີ ແລະ ດ້ານຫຍໍ້ທໍ້ ທີ່ກະທົບຕໍ່ສັງຄົມ ພ້ອມທັງໄດ້ ແນະນຳແນວທາງ ການໃຊ້ ສື່ສັງຄົມອອນລາຍ ຢ່າງຖືກຕ້ອງ ແລະ ປອດໄພ. ນອກນັ້ນ ກໍ່ຍັງໄດ້ສະເໜີເນື້ອໃນ ກົດໝາຍວ່າດ້ວຍ ການຕ້ານ ແລະ ສະກັດກັ້ນອາຊະຍາກຳທາງຄອມພິວເຕີ ເພື່ອໃຫ້ຜູ້ເຂົ້າຮ່ວມໄດ້ຮູ້ ແລະ ມີສະຕິໃນການນຳໃຊ້ອິນເຕີເນັດ. ພ້ອມດຽວກັນນັ້ນ, ບໍລິສັດ ລັດວິສາຫະກິດ ລາວໂທລະຄົມ ກໍ່ໄດ້ມີການແນະນຳ ການນຳໃຊ້ອິນເຕີເນັດຢ່າງປະຫຍັດ ເລືອກຜະລິດຕະພັນ ໃຫ້ເໝາະສົມກັບຄວາມຕ້ອງການຂອງຕົນ.
ໃນງານດັ່ງກ່າວ ທ່ານ ປອ. ທະວີສັກ ມະໂນທັມ ໄດ້ກ່າວບາງຕອນວ່າ “ ປະຈຸບັນ ສື່ສັງຄົມອອນລາຍ ໄດ້ກາຍເປັນໜຶ່ງປັດໃຈສຳຄັນ ຂອງການດຳລົງຊີວິດ ແລະ ຫຼາຍຄົນກໍ່ຂາດບໍ່ໄດ້ ໂດຍສະເພາະທີ່ຕ້ອງນຳໃຊ້ໃນ ວຽກງານ, ການເຮັດທຸລະກິດ ຫຼື ການສຶກສາ-ຮຳຮຽນ, ແຕ່ຄຽງຄູ່ກັນນັ້ນ ສື່ສັງຄົມອອນລາຍກໍ່ມີຄວາມສ່ຽງ ແລະ ສ້າງຜົນເສຍຫາຍໃຫ້ແກ່ຜູ້ໃຊ້ໄດ້ຫຼາຍເຊັ່ນກັນ. ຈາກບັນຫາດັ່ງກ່າວ ຈຶ່ງຈຳເປັນທີ່ພວກເຮົາຕ້ອງຮັບຮູ້ເຖິງຜົນດີ-ຜົນຮ້າຍຂອງການນຳໃຊ້ສື່ສັງຄົມອອນລາຍນີ້ ”.
ຜ່ານການລົງເຜີຍແຜ່ໃນຄັ້ງນີ້ເຫັນວ່າ ບັນດານັກສຶກສາຜູ້ເຂົ້າຮ່ວມມີຄວາມສົນໃຈ ແລະ ຕິດຕາມການນຳ ສະເໜີເນື້ອໃນແຕ່ລະຫົວຂໍ້ຢ່າງກະຕືລືລົ້ນ ເນື່ອງຈາກໃນຊີວິດປະຈຳວັນແມ່ນໄດ້ໃຊ້ເວລາກັບການນຳໃຊ້ສື່ສັງຄົມ ອອນລາຍເປັນສ່ວນຫຼາຍຈຶ່ງເຮັດໃຫ້ບັນດາຜູ້ເຂົ້າຮ່ວມເຂົ້າໃຈໄດ້ໄວ ໂດຍສະແດງອອກດ້ວຍການແຂ່ງຂັນກັນຕອບ ຄຳຖາມຢ່າງຄຶກຄື້ນ ແລະ ດຳເນີນໄປດ້ວຍຜົນສຳເລັດອັນຈົບງາມ.

   ກິດຈະກຳດັ່ງກ່າວ ກໍ່ຈະສືບຕໍ່ໃນການຈັດຕັ້ງຢູ່ ສະຖາບັນການສຶກສາ, ອົງການປົກຄອງໃນໄລຍະຕໍ່ໄປ ເພື່ອໃຫ້ສັງຄົມໄດ້ຮັບຜົນດີ ແລະ ຫຼີກລ້ຽງ ຜົນຮ້າຍຂອງສື່ສັງຄົມອອນລາຍ.