01000100 01001001 01010100 ກົມເຕັກໂນໂລຊີ ການສື່ສານຂໍ້ມູນຂ່າວສານ

ການຝຶກອົບຮົມກ່ຽວກັບ ລະບົບດາວທຽມ BeiDou ທີ່ ສປ ຈີນ



   ໃນລະຫວ່າງວັນທີ 04-17 ທັນວາ 2017, ທາງ​ປະ​ເທດ ສປ ຈີນ ​ ໄດ້​ຈັດງານສຳມະນາໃນຫົວຂໍ້ “ລະບົບສັນຍານ​ດາວ​ທຽມໄບດູ ສຳລັບ​ ພະນັກງານ​ພາກ​ລັດ​​ໃນປະ​ເທດ​ທີ່​ກໍາລັງ​ພັດທະນາ”, ​ເຊິ່ງມີ​ຜູ້​ເຂົ້າ​ຮ່ວມ ​ທັງໝົດ ຈໍານວນ 13 ທ່ານ,​ ຈາກ​ປະ​ເທດ​ນາ​ມີ​ເບຍ 1 ທ່ານ, ​ເລ​ບາ​ ນອນ 2 ທ່ານແລະ ຈາກ ສປປລາວ 10 ທ່ານ, ​​ເຊິ່ງທາງ ສປປລາວ ​ປະກອບ​ມີ​ຕົວ​ແທນ​ຈາກ​ບໍລິສັດ​ດາວ​ທຽມ​ລາວ, ບໍລິສັດອີ​ທີ​ແອວ,ຫ້ອງ ການ​ປົກຄອງ​ເມືອງ ​ແລະ ພະນັກງານ​ຈາກກະຊວງ ປທສ 3 ທ່ານ.

   ໃນການສຳມະນາ ​ມີການສະ​ເໜີ ​ແລະ ​ແນະນຳ ກ່ຽວ​ກັບ​​ເຕັກ​ໂນ​ໂລ​ຊີ​ຕ່າງໆ ດ້ານດາວ​ທຽມ ໃນ ສປ ຈີນ ເຊັ່ນ ການພັດທະນາ ແລະ ສະຖານະພາບ ລະບົບດາວທຽມ BeiDou ໃນປະຈຸບັນ, BeiDou CORS datum service, timescale of BeiDou ແລະ precision of BeiDou System in agricultural application. ນອກນັ້ນຍັງໄດ້ຮຽນຮູ້ແນວທາງອັນສຳຄັນ ກໍຄືນະໂຍບາຍຂອງ ທ່ານ “Xi Jinping” ປະທານປະເທດຂອງ ສປ ຈີນ ກ່ຽວກັບ Cyberspace ເປັນຕົ້ນແມ່ນ ແຜນຍຸດທະສາດຫຼັກການຮ່ວມມື the Belt and the Road ຫຼື Silk Road economic belt ແລະ ອື່ນໆທີ່ກ່ຽວຂ້ອງ ພ້ອມກັບຮຽນຮູ້ການພັດທະນາເຕັກໂນໂລຊີຕ່າງໆ ຄຽງຄູ່ກັບການອອກນິຕິກຳ ເພື່ອຄຸ້ມຄອງ Cybersecurity.

  ນອກຈາກ ການສຳມະນາທີ່ສະແດງໃຫ້ເຫັນເຖິງການພັດທະນາ, ຄວາມຮູ້, ເຕັກໂນໂລຊີ ແລະ ແນວທາງຂອງສປ ຈີນແລ້ວ, ຍັງໄດ້ມີການແລກປ່ຽນບົດຮຽນ ດ້ານວັດທະນະທຳ, ພາສາ ພ້ອມກັບການທ່ອງທ່ຽວຊົມສະຖານທີ່ຕ່າງໆທີ່ກ່ຽວຂ້ອງ ລະບົບດາວທຽມ BeiDou ແລະ ສະຖານທີ່ວັດທະນະທໍາອື່ນໆ ທີ່ສະແດງໃຫ້ເຫັນເຖິງ ປະຫວັດສາດອັນເກົ່າແກ່ ແລະ ການພັດທະນາພາຍໃນປະເທດໃນໄລຍະຜ່ານມາ. .

  ເວົ້າລວມແລ້ວ ຈຸດປະສົງຫຼັກຂອງການສຳມະນາ ທີ່ສປ ຈີນ ກໍ່ເພື່ອເພີ່ມທະວີການຮ່ວມມື ແລະ ແລກປ່ຽນບົດຮຽນກ່ຽວກັບການນຳໃຊ້ເຕັກໂນໂລຊີ, ລະບົບດາວທຽມ BeiDou, ການພັດທະນາເສດຖະກິດໃນ ສປ ຈີນ ກັບບັນດາປະເທດທີ່ກຳລັງພັດທະນາ ຄຽງຄູ່ກັບເຜີຍແຜ່ແຜນຍຸດທະສາດການຮ່ວມມື ທາງດ້ານ Cyberspace ຂອງທ່ານປະທານ “Xi Jinping” ການສຳມະນາ ແລະແລກປ່ຽນບົດຮຽນຄັ້ງນີ້ ຍັງເປັນການເສີມຂະຫຍາຍສາຍພົວພັນມິດຕະພາບ ລະຫວ່າງ ລາວ-ຈີນ ໃຫ້ເລິກເຊິ່ງຍິ່ງຂື້ນ, ເຊິ່ງທາງກົມເຕັກໂນໂລຊີການສື່ສານຂໍ້ມູນຂ່າວສານ ກະຊວງ ປທສ ກໍ່ເລັງເຫັນເຖິງໂອກາດ ແລະ ໝາກຜົນ ໃນການຮ່ວມມື ແລະ ຍາດແຍ່ງການຊ່ວຍເຫຼືອ ດ້ານການພັດທະນາບຸກຄະລາກອນ ແລະ ກອບວຽກໃນການຮ່າງນິຕິກຳຄຸ້ມຄອງດ້ານ ICT ຕ່າງໆ ຈາກ ສປ ຈີນ ເພື່ອຖອດຖອນບົດຮຽນ, ເປີດໂລກະທັດການຮຽນຮູ້, ກ້າວໄປສູ່ລັດແຫ່ງກົດໝາຍ, ພັດທະນາສັງຄົມ-ເສດຖະກິດ ດີຈີຕອນ ໃຫ້ທັນກັບບັນດາປະເທດອ້ອມຂ້າງ ແລະ ສາກົນ.