01000100 01001001 01010100 ກົມເຕັກໂນໂລຊີ ການສື່ສານຂໍ້ມູນຂ່າວສານ

ອີກຄັ້ງໜຶ່ງ ຄົນລາວໄດ້ຮັບລາງວັນ ໃນງານປະກວດການແຂ່ງຂັນ ໄອຊີທີອາຊຽນປະຈໍາປີ 2017 ຫຼື ASEAN ICT AWARD 2017.



   ການປະກວດການແຂ່ງຂັນໄອຊີທີອາຊຽນ ແມ່ນເວທີປະກວດຜະລິດຕະພັນທາງດ້ານໄອຊີທີລະດັບພາກພື້ນອາຊຽນ ຊຶ່ງໄດ້ລິເລີ່ມແຕ່ປີ 2012 ທີ່ປະເທດບຣຸໄນ ແລະກໍ່ໄດ້ສືບຕໍ່ຈັດຂື້ນທຸກໆປີ ພ້ອມກັບກອງປະຊຸມ ເຈົ້າໜ້າທີ່ອາວຸໂສອາຊຽນ ແລະ ກອງປະຊຸມລັດຖະມົນຕີອາຊຽນດ້ານໂທລະຄົມມະນາຄົມ ແລະ ເຕັກໂນໂລຊີການສື່ສານຂໍ້ມູນຂ່າວສານ ຫຼື TELSOM/TELMIN ຊຶ່ງປີ 2017 ໄດ້ຈັດຂື້ນທີ່ເມືອງສຽມລຽບ ປະເທດກໍາປູເຈຍ ໃນທ້າຍເດືອນພະຈິກ 2017. ຊຶ່ງການປະກວດຄັ້ງນີ້ມີຜະລິດຕະພັນເຂົ້າຮອບສຸດທ້າຍຂອງການແຂ່ງຂັນທັງໝົດ 18 ຜະລິດຕະພນ ຈາກທັງໝົດ 117 ຜະລິດຕະພັນ ໃນ 6 ໝວດ (categories) ແລະຕາງໜ້າຈາກ ສປປ ລາວ ກໍ່ສາມາດຄວ້າ 2 ລາງວັນໃນງານ.

   2 ຜະລິດຕະພັນຈາກ ສປປ ລາວ ເຂົ້າຮອບສຸດທ້າຍຈໍານວນ 2 ທີມຄື: ທີມ Lao Autism Talks ໃນໝວດ ເພື່ອສັງຄົມ Corporate Social Responsibility ແລະ ທີມ LaoNavi ໃນໝວດເນື້ອໃນດີຈີຕອນ Digital Content. ສິ່ງທີ່ເປັນກຽດ ແລະ ພາກພູມໃຈໃຫ້ແກ່ປະເທດຊາດ ນັ້ນກໍ່ແມ່ນທີມຈາກ ສປປ ລາວ ສາມາດຍາດມາໄດ້ ອັນດັບທີ 2 ຈາກທີມ Association for Autism ໃນຜະລິດຕະພັນ Lao Autism Talks ປະກອບມີ ທ່ານ ທະວີສຸກ ດວງດາລາ, ທ່ານ ນາງ ມິສຸດາ ເຮືອງສຸກຄຸນ ແລະ Mrs. Sharon Gorton ແລະ ໄດ້ອັນດັບທີ 3 ຈາກທີມ DevZy Technology ໃນຜະລິດຕະພັນ LaoNavi ປະກອບມີ ທ່ານ ສະເຫຼີມສັກ ແກ້ວບົວໄລ, ທ່ານ ທະນົງສິນ ຈັນທະຄໍາ ແລະ ທ່ານ ກັນຍາ ໄຊຍະຫານ. ລາງວັນດັ່ງກ່າວທີ່ໄດ້ມາຖືເປັນຄວາມພາກພູມໃຈຢ່າງຍິ່ງຕໍ່ກັບຜົນງານຂອງນັກຄົ້ນຄວ້າ ແລະ ວິໄຈ ຈາກບໍລິສັດ ຕ່າງໆ ທີ່ສ້າງຊື່ສຽງໃຫ້ ສປປ ລາວ ພົ້ນເດັ່ນຂື້ນ ໃນເວທີພາກພື້ນ ແລະ ອາຊຽນດ້ານການພັດທະນາເຕັກໂນໂລຊີການສື່ສານ-ຂໍ້ມູນຂ່າວສານ. ນີ້ກໍ່ເປັນອີກຄັ້ງໜຶ່ງທີ່ຕາງໜ້າຈາກ ສປປ ລາວ ສາມາດຄວ້າລາງວັນໃນງານດັ່ງກ່າວ ຫຼັງຈາກທີ່ສາມາດໄດ້ລາງວັນທີ 1 ໃນປີ 2012 ແລະ ລາງວັນທີ 3 ໃນປີ 2015 ມາແລ້ວ.






ໃນປີ 2018, ກະຊວງ ປທສ ກໍ່ຈະສືບຕໍ່ສົ່ງເສີມ ບັນດານັກປະດິດ ແລະ ນັກພັດທະນາຮຸ່ນໃໝ່ ດ້ວຍຮູບການຈັດການປະກວດໄອຊີທີລາວ 2018 ເພື່ອເປັນບາດກ້າວທໍາອິດ ໃນການຄັດເລືອກຜະລິດຕະພັນດີເດັ່ນ ເພື່ອເຂົ້າແຂ່ງຂັນໃນລະດັບອາຊຽນ. ເພື່ອເຮັດແນວໃດໃຫ້ວຽກງານທາງດ້ານໄອຊີທີ ຂອງລາວເຮົາໄດ້ຮັບການພັດທະນາ ແລະ ສາມາດຕອບສະໜອງ ກັບຄວາມຕ້ອງການຂອງສັງຄົມ ແລະ ເສດຖະກິດ.





ຂໍຊົມເຊີຍມາຍັງຜູ້ເຂົ້າຮ່ວມປະກວດການແຂ່ງຂັນທຸກທ່ານ.