01000100 01001001 01010100 ກົມເຕັກໂນໂລຊີ ການສື່ສານຂໍ້ມູນຂ່າວສານ

ກອງ​ປະ​ຊຸມ ຜ່ານຮ່າງບົດ​ສຶກ​ສາ​ຄວາມ​ເປັນ​ໄປ​ໄດ້ ໃນກ​ານ​ສ້າງ​ຕັ້ງ​​ຕະຫຼາດ​​ໂທ​ລະ​ຄົມ​ມະ​ນາ​ຄົມ ​ແຫ່ງ​ດຽວຂອງອາ​ຊຽນ



   ກອງ​ປະ​ຊຸມ ຜ່ານຮ່າງບົດ​ສຶກ​ສາ​ຄວາມ​ເປັນ​ໄປ​ໄດ້ ໃນກ​ານ​ສ້າງ​ຕັ້ງ​​ຕະຫຼາດ​​ໂທ​ລະ​ຄົມ​ມະ​ນາ​ຄົມ​ແຫ່ງ​ດຽວ ຂອງອາ​ຊຽນ ຫຼື ASEAN Telecommunication Single Market ແມ່ນກອງ​ປະຊຸມ ​ທີ່​ມີ​ການປຶກ​ສາ​ຫາ​ລືກັນ ​ເພື່ອ​ເຫັນ​ດີ​ເປັນ​ເອ​ກະ​ພາບ​ ກ່ຽວ​ກັບແຜນ​ແມ່​ບົດ ແລະ ແຜນກ​ານ​ສ້າງ​ຕັ້ງ​​ຕະຫຼາດ​​ໂທ​ລະ​ຄົມ​ມະ​ນາ​ຄົມ​ແຫ່ງ​ດຽວຂອງອາ​ຊຽນ ​ເຊິ່ງຕະຫຼາດ​ໂທ​ລະ​ຄົມມະນາຄົມ​ແຫ່ງ​ດຽວ​ຂອງ​ອາ​ຊຽນ ມີ​ເປົ້າໝາຍ​ໃນ​ການ​​ເປັນ​ຈຸດ​ສຸມ​ການພັດທະນາ​ຄວາມ​ອາດ​ສາມາດຮອບດ້ານ ​ດ້ານ​​ໂທລະ​ຄົມມະນາຄົມ (ນະ​ໂຍບາຍ, ລະບຽບ, ຄຸນ​ນະພາ​ບການ​ບໍລິການ, ລາຄາ, ຊັບພະຍ​ອນມະນຸດ​ດ້ານ​ໂທລະ​ຄົມ ​ແລະ ອື່ນໆ) ​ໃຫ້​ເປັນ​ສື່​ກາງ​ແຫ່ງ​ດຽວ ຢ່າງ​ພ້ອມພຽງ​ກັນ​ພາຍ​ໃຕ້​ປະຊາ​ຄົມອາ​ຊຽນ;
   ລ້າສຸດ, ​ໄດ້​ມີ​ກອງ​ປະຊຸມ​ກະກຽມ ທີ່ຈັງວັດ ບາງກອ​ກ, ປະ​ເທດ​ໄທ​ ໃນລະຫວ່າງ​ວັນ​ທີ 15-17/10/2017, ​ ເພື່ອ​ສະ​ເໜີພິ​ຈາ​ລະ​ນາຮັບ​ຮອງ​ຂັ້ນ​ຕອນ​ການ​ຈັດ​ຕັ້ງ​ປະ​ຕິ​ບັດ ໃນ​ກອງ​ປະ​ຊຸມ TELSOM/TELMIN ທ​ີ່​ຈະ​ໄຂ​ຂື້ນ​ໃນ​ຊ່ວງເດືອນ 11/2017 ທີ່​ສຽມລຽບ, ປະເທດ ກຳ​ປູ​ເຈຍ. ເຊິ່ງທາງ ສປປ ລາວ​ ກໍ່ແມ່ນຕົວແທນກະຊວງ​ໄປສະນີ​ໂທ​ລະ​ຄົມມະນາຄົມ ​ແລະ ການ​ສື່ສານ, ກົມເຕັກໂນໂລຊີການສື່ສານ ​ເຂົ້າ​ຮ່ວມ.
   ຈຸດ​ປະ​ສົງ​ຂ​ອງກອງ​ປະ​ຊຸມ ແມ່ນ​ເພື່ອ​ປຶກ​ສາ​ຫາ​ລື ແລະ ຕົກ​ລົງ​ເຫັນ​ດີ​ເປັນ​ເອ​ກະ​ພາບ ​ໃນ​ກາ​ນຮ່າງ​ບົດສືກ​ສາ​ຄວາມ​ເປັນ​ໄປ​ໄດ້, ແຜນ​ແມ່​ບົດ ແລະ ແຜນກ​ານ​ສ້າງ​ຕັ້ງ​​ຕະຫຼາດ​ແຫ່ງ​​ດ່ຽວ​ດ້ານ​ໂທ​ລະ​ຄົມ​ມະ​ນາ​ຄົມ​ອາ​ຊຽນ (ນຳ​ສະ​ເໜີ​ໂດຍ ກອງ​ເລ​ຂາ​ອາ​ຊຽນ ແລະ ຊ່ຽວ​ຊານຈາກ​ອົດ​ສະ​ຕາ​ລີ-ອັງ​ກິດ) ໃນກອງປະຊຸມມີຕົວແທນຜູ້ເຂົ້າຮ່ວມຈາກ 10 ປະເທດອາຊຽນ ລວມທັງໝົດປະມານ 20 ທ່ານ, ຊຶ່ງມີການນໍາສະເໜີບົດສຶກສາ ການລິເລີ້ມແນວຄວາມຄິດຈັດຕັ້ງປະຕິບັດ ໂຄງການສ້າງຕະຫຼາດແຫ່ງດຽວດ້ານໂທລະຄົມມະນາຄົມອາຊຽນ ໂດຍການບັນຍາຍຂອງຊ່ຽວຊານຈາກບໍລິສັດ Incyte Consulting ປະເທດອົດສະຕາລີ.
   ກອງປະຊຸມ ມີການຖາມ-ຕອບ ເຖິງທິດທາງ ແລະ ນະໂຍບາຍດ້ານຍຸດທະສາດ, ຂໍລິເລີ່ມຕ່າງໆ ຕະຫຼອດຮອດຫຼັກການໃນການຈັດຕັ້ງປະຕິບັດ ASEAN TSM ຂອງບັນດາປະເທດອາຊຽນ. ພ້ອມນັ້ນກໍ່ໄດ້ປຶກສາຫາລື ແລະ ປັບປຸງບົດສໍາຫຼວດ ຈາກການປະກອບຄໍາເຫັນຂອງປະເທດສະມາຊິກອາຊຽນ ເພື່ອໃຫ້ທາງກອງເລຂາອາຊຽນສັງລວມລາຍງານ ແລະ ຮັບຮອງການຈັດຕັ້ງປະຕິບັດແຜນງານດັ່ງກ່າວໃນກອງປະຊຸມ TELMIN ທີ່ຈະຈັດຂື້ນໃນເດືອນພະຈິກ 2017, ປະເທດກໍາປູເຈຍ.

   ຜ່ານ​ການ​​ປຶກສາ​ຫາລື​ໃນ​ກອງ​ປະຊຸມ ກໍ່​ໄດ້ສັງ​ເກດ​ເຫັນ ກາລະໂອກາດ ແລະ ສິ່ງທ້າທາຍ ຕໍ່ຂະແໜງການ ປທສ ໃນການເຂົ້າຮ່ວມ TSM, ໂດຍກົມເຕັກໂນໂລຊີການສື່ສານຂໍ້ມູນຂ່າວສານ ຕ້ອງໄດ້ສຸມໃສ່​ການປະສານງານ​ເພື່ອຮ່ວມມືລະດັບພາກພື້ນ ແລະ ວິເຄາະທິດທາງລວມດ້ານການເຊື່ອມໂຍງຕະຫຼາດ ​ເປັນ​ຕົ້ນ ການກໍານົດອັດຕາຄ່າບໍລິການພາຍໃນ, ການແຂ່ງຂັນດ້ານການຕະຫຼາດ ສົມທົບກັບການວາງ ລະບຽບຫຼັກການ ແລະ ນິຕິກໍາຕ່າງໆໃນການຄຸ້ມຄອງ.

   ແນວ​ໃດ​ກໍ່ຕາມທິດທາງການສ້າງລະບົບການເຊື່ອມໂຍງຕະຫຼາດ​​ໂທ​ລະ​ຄົມ​ມະ​ນາ​ຄົມ​ແຫ່ງ​ດຽວ ຂອງອາ​ຊຽນ ASEAN TSM ລວມມີການເຊື່ອມໂຍງແບບດີຈີຕອນ ແລະ ການນໍາໃຊ້ເຕັກໂນໂລຊີເຂົ້າມາຊ່ວຍການພັດທະນາເສດຖະກິດ-ສັງຄົມ ແລະ ການຫັນເປັນທັນສະໄໝເທື່ອລະກ້າວໃນຂົງເຂດການຮ່ວມມືພາກພື້ນ ແລະ ສາກົນ ແມ່ນມີຄວາມສໍາຄັນ ແລະ ເປັນບາດກ້າວໃໝ່, ​ເຊິ່ງ ສປປ ລາວ ຕ້ອງ​ໄດ້ສືບ​ຕໍຈັດຕັ້ງປະຕິບັດ ແຕ່ນີ້ຮອດປີ 2020.